لسة العدل مجاش !

 

سيبنا الثورة وسلمناها..

أصل الجيش بيقولو حماها..

والحرية اللى بنحلمها..
...
قالو فى سِت شهور نلقاها..

استفتاء تعديل دستور..

حبسو كل نظامنا السابق..

دايرة ولازم كات هتدور..

بعد الحبس صبحو سوابق..

بعد ما عدِّت كل الفترة..

جينا نشوف محصول الثورة..

جينا نحسبها لقينا مفيش..

كل اللى أخدناه من المجلس..

ألف بيان طالع م الجيش..

قولتم ان الموقف صعب..

وضع هياخد وقت كتير..

ثورة وتعبان فيها الشعب..

بس مَحسِّش بالتغيير..

حَس شبابنا بثورة اتسرقت..

قالو هنرجع للتحرير..

فجأة سمعنا وزير بيقول..

فى الداخلية مفيش قناص..

بَعده المجلس قال علطول..

ان مجالناش أى أوامر..

ان الجيش يضرب برصاص..

انا مش قصدى أخوِّن جيشنا..

انا نِفسى افهم من مجلسنا..

قَطر الثورة.. رايح فين؟..

سِبتم مين من غير تخوين؟..

الف شهيد فى الثورة اتقتلو..

اللى قتلهم يطلع مين؟!..

حاجة أخيرة عشان منساش..

دم اخواتنا مش ببلاش..

ثورة ولازم هنكملها ..

علشان لسة العدل ..مجاش !

أنا بُكرة هَفْرَح !

أنا بُكرة هَفْرَح !
مش محل جديد ... ومش يافطة متعلقة على على طريق مصر اسكندرية الصحراوى
أنا بُكرة هَفْرَح !
أول ديوان اليكترونى أكتبه
للتحميل..... طلّع عشرة جنيه من جيبك وحطها تانى فى نفس الجيب:)

لينك التحميل
http://www.mediafire.com/?ml9n6sv37699jyk#१

صفحة الديوان على goodreads
http://www.goodreads.com/book/show/12729086

رأيك يهمنى :)

يــــــ ( رب )ـــا

صحيح يا رب أنا بعصاك

وذنوبى فى الحياة بتكتر

لكنى يارب مطمن

لأن رحمتك ..أكبر

ومهما اعصاك بتغفرلى

وبعد الذنب بتقوللى

أنا مسامحك

وقابل منك التوبة

وبعد يارب ما اترجاك

وبعد ما بعلن التوبة

برجع لذنوبى من تانى

يارب كتير بِتمهلنى

ومفيش ولا مرة تِهملنى

مفيش ولا مرة تنسانى

ومن تانى

ارجع كالعادة واترجاك

وأقول يارب مش هعصاك

يارب.. انت اللى قولتلنا

لو احنا فى مرة مغلطناش

هتمحينا

وتخلق فى الحياة غيرنا

ومين فى الدنيا مبيغلطش

ومين فى الدنيا دى معصوم

ندمان ..نعلنها لما نصوم

وتِعْلى ادينا بالدعوة

عشان بالرحمة تقبلنا

نغلط يا رب وبتغفر

وبعد الذنب نستغفر

ونترجاك...

يارب شيطان وبغوينا

فتعلى َ للسما ادينا

عشان بالعفو تقبلنا

نسيب الفرض والسنة

ونستغفر

قلوب طمعانة.. تتمنى

فى يوم ترضيها بالجنة

يارب ارضيها بالجنة
.
.
.يارب :)
==
by *_ma7moud Taha

بداية .... ونهاية

يا رئيس الدولة ياللى...

بـِعت وطنك من سنين...

كان أمان الدولة عندك...

شرطة واقفة فى الكمين...

المواطن رغم خوفه...

عذبوه...

كم ألف طفل فى الشوارع...

شردوه...

أى مصنع كان بينتج...

خصخصوه...

لاء وغازنا للعدو...

صدروه...

كنت عامل فيها طيب...

والحقيقة...

وحش كاسر جوا غابة...

كنت عامل فيها ريس...

والحقيقة...

انت كنت رئيس عصابة...

كان زمان لو قولت حق...

من كرامتى يجردونى...

ولو رفضت وقولت لاء...

بالحياة كانو يدفنونى...

بس فجأة المصرى ثار...

عاللى منه مصر عانت...

والشهيد كاتب بدمه...

افرحو .. أهى مصر عادت...

من زمان انا كنت عارف...

ان يوم النصر جىّ...

وان فجر العدل طالع...

طول ما نبض القلب حىّ...

لو البداية كلمة واحدة...

فالنهاية كلام كتير...

البداية ظلم واضح...

والنهاية...

ثورة انتصرت
فى التحربر
==
by.. *_Mahmoud Taha

أنا والقذافى.. والشمسية

القذافى رجل العصر.. او المغرب مش هتفرق ..هاهو القذافى فاجئنا بخطابين

احدهما يمثل اقصر خطاب فى التاريخ

والاخر أطول خطاب فى التاريخ

اما عن الخطاب الاول فحدث ولا حرج.

. يظهر القذافى فى شىء قريب الشبه بالتوكتوك.. ممسكا بيده الملوثة بدماء شعبه .. شمسية مفتوحة مع انه راكب فى التوكتوك.. وتفوه بكلمات لم تستطيع الغدد الدمعية لدىّ ان تتوقف حينها

وكما يقولون " خير الكلام ما قل ودل " .." انا فى طرابلس لست فى فنزويلا " يا لها من كلمات تضم كل مفردات الثقافة والعلم

بعد ما ألقى القذافى هذا الخطاب التاريخى .. قام الاخوة اللطاف بشن صفحة على الفيسبوك تحت مسمى "الراجل اللى ملحقش يقف ورا القذافى "

يمكن علشان الجو كان بيمطر والتوكتوك كان صغير مثلا !!

وما كان من الجماهير العريضة الا ان ترفع شعار " يا قذافى يا مسلينا .. عشر ثوانى شوية علينا "

اما عن الخطاب الثانى " وما أدراك ما الخطاب الثانى "..

يظهر القذافى فى مكان قريب الشبه ببير السلم

ممسكا بكتابه الاخضر .. وأخذ يقرأ او يقص علينا ما يتضمنه الكتاب بين دفتيه من قوانين

من يتعدى على أمن ليبيا " اعدام " .. من من يساعد على ادخال الاحتلال الى ليبيا " اعدام "

من يتسبب فى عمل فتنة طائفية " اعدام " .. اللى هيتظاهر " اعدام ".. اللى مش عاجبه الكلام دا "اعدام ".

."اعدام " ثم " اعدام"

من حاول فك ضفائرها .. اعدام اعدام اعدام اعدااااااااااام يا ولدى

كما قال ايضا " لو كنت رئيسا لرميت الاستقالة في وجوهكم" ..!! .. دا على اساس انك بتبيع عرق سوس فى طرابلس

وأردف قائلا: لم اصدر بعد امرا باستخدام السلاح حينها سيحرق كل شيء.. امال لو أصدرت أمر باستخدامه !!

وأضاف ايضا: قاتلنا فرنسا وامريكا والسادات وحبري وحتى بورقيبة والنميري.

ياراجل !!... عملت كل دا لوحدك .. " الكلام دا كان فى لعبة ايه"؟

وكلام اخر طويل عريض لم استطيع فهمه .. كنت فى حاجة الى أحد المختصين ..لترجمة ما يقوله القذافى

وأنهى خطابه بالزحف المقدس ان لم يتراجع المحتجين .. او الاطفال الذين يأكلون البنانا او الموز

وفجأة استيقظ على صوت احدهم " اصحى يا " اللى هو انا يعنى " الخطاب خلص "

هو كان لسة شغال !!

ويستطيع اى طفل فى العالم ان يستنتج شيئين لا ثالث لهما

أولهما ان القذافى شارب مخدرات قبل الخطاب .. وثانيهما انه شارب مخدرات قبل الخطاب

كما تقدمت قناة الجزييرة والعربية وكل القنوات التى قامت بعرض خطاب القذافى .. بالاعتزار لكافة المشاهدين

على ما تم عرضه موضحين ان هذا الخطاب لا يصلح عرضه الا على موجة كوميدى

واخيرا اقولها للقذافى

" الله يخربيت اللى يزعلك "

سؤالى لك ايها القارىء

بذمتك ضحكت قبل كدا زى ما ضحكت وانت بتتفرج على خطاب القذافى ؟

D:

تخاريــــــف

ممسكا بسيجارة فى يدى علامات التوتر تظهر على وجهى

متوجها الى مكان ما.. لا ادرى ما هو

اخذت نفسا عميقا من سيجارتى.. ولكننى ادركت اننى لم اشعلها بعد..هممت لاخراج الكبريت من جيبى

فاذا به لم يكن موجودا .. فاكتفيت بلف السيجارة فى نفس الورقة التى اخرجتها منها " نظرا لانها كانت سجاير فرط "

وأكملت طريقى فاذا بى فى منتصف كوبرى قصر النيل

فأدركت مدى شجاعتى عند مرورى من بين الاسدين دون ان اشعر بأدنى رهبة او خوف

وتذكرت تلك اللحظات التى تم تصويرى فيها الى جوار الاسد حيث قال لى" انزل العب بعيد ياض "

فتفوهت اليه برد قد افحمه " ادخل عرينك يا اسد ومتهزرش مع الكبير "

وبعد هذا السرد للرد العظيم الذى تفوهت به

انتابتنى رهبة وقشعريرة فى بدنى جراء وقوفى فى هذا المكان فقد ذكرت سالفا انه منتصف كوبرى قصر النيل

فتذكرت فى تلك اللحظة خبرا قد قرأته " انتحار شاب بالقفز من اعلى كوبرى قصر النيل "

وتذكرت ايضا : انتحار شاب اخر بربط عنقه بطرف حبل والطرف الاخر تم ربطه بالكوبرى وقفذ الى نفس ذات النيل "

وغيرها وغيرها من الاخبار التى تربطها علاقة واحدة الا وهى الاشتراك فى القفز من فوق الكوبرى

فقد انتحر احدهم لانه لا يجد قوت يومه حيث ركب قطار البطالة مبكرا

ومن الحقائق العلمية الثابتة ان طريق البطالة اتجاه واحد فقط " يعنى اللى بيروح مبيرجعش "

فنحن فى مصر بلد المتناقضات.. ترى احدهم يستقل افخم السيارات والبعض الاخر واقفا على سلالم الاتوبيسات

وأحدهم يسكن فى افخم القصور وعامة الشعب فى أحط العشش وتحت الكبارى

عدا اسفل منتصف كوبرى قصر النيل " علشان تحته ميه يا ذكى "

انا هنا لست لاتحدث عن الحقد الطبقى الذى انطوى عليه صدرى ولكننى اريد ان اعرف لماذا كل حالات الانتحار هذه

وأنا على يقين تام ان السبب هو " ديكتاتورية ميم "

تذكرت مسرحية " تخاريف " عندما قال العبقرى محمد صبحى " شعبى الحبيب الصبور المهاود"

فهذه الجملة فيها ما فيها من العبقرية حيث يمكن تطبيقها فى الوقت الحالى

شعبى الحبيب الصبور المهاود تم رفع المرتبات عشرة فى المائة

وبعدها بيومين لا ثالث لهما

شعبى الحبيب الصبور المهاود تم رفع الاسعار عشرين بالمائة

شعبى الحبيب الصبور المهاود وقفة مصرية ابنى بيتك

شعبى الحبيب الصبور المهاود تم رفع اسعار الحديد والاسمنت ومتبنيش بيتك

شعبى الحبيب الصبور المهاود الضرائب مصلحتك اولا

ونجد فى نفس الوقت ان الشعب الحبيب الصبور المهاود قد طفح به الكيل

فها هى المستشفيات فى اسوأ حالاتها

والطرق لا تصلح الا للبعير وطوابير العيش وطوابير المصالح الحكومية لم تنتهى بعد .. هذا بسبب ان الضرائب مصلحتك أولا

وجارى البحث عن طارق يحى وطارق خليل وطارق محمد وطارق ابراهيم " قانون طوارىء بقى"

وها هو احد افراد الشعب قد احرق نفسه امام مجلس الشعب الذى يحتوى على نواب الشعب الذين لم يختارهم الشعب!!

انا على يقين تام ان الانتحار يتعارض مع الدين

ولكن الحياة التى يعيشها نصف سكان مصر ما هى الا موت بالبطىء

والانتحار ما هو الا طريقة لاسراع الموت..كل ما فى الأمر قفزة من فوق كوبرى او لتر بنزين تمانين

وتنتهى هذه الحياة الشبيهة بالموت

بعد ان تذكرت كل هذه الاحداث ادركت اننى ما زلت واقفا على منتصف كوبرى قصر النيل وعن يمينى أسدين وعن يسارى أسدين

وقد مرّت من جانبى سيارة يصدر منها صوت العندليب قائلا " فطريقكك مسدود مسدود مسدود يا ولدى"

وأدركت ان حالى لا يختلف كثيرا عن هؤلاء الناس

فأقسمت يمينا عظيما ان انتحر بعد ان انتهى من تدخين تلك السيجارة التى ما زالت فى جيبى

ومن سوء حظى اننى تذكرت عدم وجود كبريت معى

فاكتفيت بالقاء تلك السيجارة من منتصف كوبرى قصر النيل لتستقر فى قاع النيل

وأيقنت ان كل ما تذكرته كان مجرد

" تخاريف "