الاثنين، 4 أكتوبر 2010

يبقى انت اللى ضربت قفايا أه يا قفايا


المصرى الأصلى دائما ما يقول .. أنا مش خرونج انا كينج كونج
وما حدث وما يحدث دليلا واضحا على ان تلك المقولة تفرض نفسها على المواطن المصرى
فرأينا منذ شهور احداث الشغب الجزائرى وما حدث للمصريين القدماء على أرض السودان من انتهاك حقوق قفا المواطن المصرى

فى هذه الاوقات تذكرت مقولة " مصر والسودان " وتذكرت أيضا شارع مصر والسودان
فلقد أثبت علماء النحو ان هذه الجملة بها ضمير محذوف تقديره الجزائر تم حذفه للرقابة
ورأينا ان قفا المواطن المصرى له مقدرة كبيرة على تحمل الصفعات واللكمات

ولكن حدث ما يؤكد هذا ايضا
فأثناء مباراة الاهلى والترجى التونسى .. اثبت قفا المواطن المصرى انه الاكفأ والأكثر تحملا من قفا باقى الشعوب العربية
فرأينا رجل من أمن الاستاد ملقى كفريسة بين أيدى جماهير الترجى .. وانهالو عليه جميعا كضربة رجل واحد وأحدثو طرطشة لكمات كبيرة جدا على الرجل المسكين
الذى كان ينتظر تلقى العون من الاستاد الذى تكدس بالامن المسئول عن سير المباراة دون احداث شغب

وكما عودنا الامن المصرى ان من تدخل فيما لايعنيه يبقا راجل زى الفل
فتركوه ملقى بين ايديهم هذا يضربه وهذا يلكمه وأخر يفتك به
وكأنهم فى حالة اختبار لقفا المواطن المصرى

فلتنعم الحكومة المصرية بتأكدها بأن قفانا صالح للضرب ومطابق لكافة المواصفات .. وانه قفا جامد جدا يعنى
ولكن تحضرنى بعد الاسئلة .. ماذا تفعل الحكومة المصرية بعد أن تأكدت من صلاحية قفانا .. هل ستتركه فى مرحلة اختبار قادمة ام يتضع حد لتلك المهاذل التى نراها عيانا بيانا

فنرى فى كل مرة من يخرج علينا بعبارات رنانة وخطب شديدة فيحدثنا قائلا .. تحكمنا العروبة ولا داعى للفتنة
اى فتنة هذه التى تتحدثون عنها .. المخطىء لا بد أن يعاقب .. فلا داعى لنُدخل العروبة فى مثل هذه الاجواء .. العروبة لن تهتز اذا مأاخذنا حقوقنا من تلك القلة التى تعدّت على مواطنينا .. بدون وجه حق

الذى ذاد من كمية استفذاذى هو صمت الامن المصرى وعدم تدخله لتهدئة الاجواء وانقاذ ما يمكن انقاذه
فاكتفو بالمشاهدة . ولم نرى تدخلهم الا بعد حدوث الفوضى العارمة . ومع جمهور الترجى مش هتقدر تغمض عنيك

رسالة من الشعب الى الامن
.. قفانا اتحمل كتير وتعب من تحمل الاهانات
فيا ترحمو قفانا ..يا اما توفرولنا قطع غيار للقفا .. واننا نرى ان الحل الاخير هو الافضل لاننا على يقين تام انكم مش هترحمو قفانا

وأنا مازلت واثقا تمام الثقة باننى لست خرونج وأننى كينج كونج.. وان كرامة المصرى تتناسب طرديا مع طول وعرض وارتفاع قفا المواطن

وأؤمن بأن الضرب على القفا يقلل المعرفة.. ولا عزاء لقفانا
!!
وختاما أتذكر قول الفنانة شويكار عندما كانت طوال فيلمها تردد جملة " يبقى انت اللى قتلت بابايا أه يا بابايا "
والذى ترجمها الشعب المصرى الى " يبقى انت اللى ضربت قفايا أه يا قفايا"

الفيديو يعبر أكثر من الكلام

الجمعة، 1 أكتوبر 2010

مصر هتختار طعمها !!


على دقات الثامنة صباحا استيقظ مفزوعا لأجد نفسى مستلقيا على فراشى ..شىء ما يدور امام عينى .. لم استغرق وقتا طويلا لكى ادرك بأنها المروحة بعد استيقاظى من نوم عميق .. وبعد اداء صلاة الصبح المفروضة التى يغفل الكثيرون عنهاجلست فى حجرتى .. شىء ما امام عينى يؤرقنى .. ألا وهو ريموت التلفاز هممت بالضغط عليه .. فوجدت ان مصر بتختار طعمها.. وعلى طريقة ابراهيم نصر ... ما تيجى نشوف

فى الوقت اللى كانت مصر بتختار طعمها برعاية شيبسى كان فى حاجات كتيرة بتحصل حوالينا فى بلدنا ام الدنيا مصر " وردة كل عصر"وبرغم ان ناس كتيرة شاركت فى الاختيار دا منهم اللى اختار بطعم البطيخ .. ومنهم الى اختار بطعم المكرونة " بالصلصة طبعا "وحاجات غريبة كدابس الغريب فى الامر ان وسط الاختيارات دى كلها كان فى ايدين خفية بتختار بطعم مختلف وغريب فى نفس الوقت ..الاختيار دا شد انتباهى لانه كان ليه مذاق خاصخلونا نتعرف على الطعم مع بعض

بعد اطمئنانى على مستقبل مصر المحصور فى كيفية اختيار طعمها.. نزلت للشارع كى اشاهد المنظر بنفسى لقيت الزبالة منتشرة فى كل مكان ومصادر التلوث كتيرة ..ولما سألت واحد وقولتله " هى ليه الناس مش بتتكلم عن التلوث دا.....قاللى " الناس مش فاضية .. الناس بتختار طعمها دلوقت فجال فى خاطرى " حلوة خاطرى دى " ان اختيار الطعم مهمة قومية .. وبما انى مخترتش طعمى لسة يبقا انا خاين للوطن .. وقولت انى هفكر فى اختيار طعمى مع المصريين

بعد اللى حصل دا . روحت لاحد المصالح الحكومية لقيت الرشوة منتشرة فى فى كل مكان .. كنوع من انواع الكوسة.. مشكلتى مع الكوسة انى مش بعرف اقور.. علشان كدا مش بستخدمهاسألت واحد كان واقف قولتله " ليه الناس مش بتتكلم عن الرشوة وسايباها كدا"قاللى " الناس مش فاضية .. الناس بتختار طعمها " ..فى الوقت دا كانت الناس بدأت تختار بطعم السمك .. ونا لسة مفكرتش اختار طعمى .. ودم الوطنية بدأ يغلى فى عروقى .. وقررت انى هختار طعمى .. لانى زى منتو عارفين وطنى من طراز خاص

فى الوقت دا بدأ التحذيرات تنزل فى التليفزيون ان اى حد يختار طعمه " يلحق يبعت قبل أخر يوليو"بعد ما خلصت مصلحتى فى المصلحة الحكومية .. ووقوفى فى طابور اوله عند رمسيس وأخره عند الدائرى نزلت الشارع لقيت فى ناس كتير متجمعة .. شايف الراجل اللى هناك دا .. أيون اللى شايل ابنه على ايده دا .. ماسك فى ايده التانية صورة مكتوب عليها " كلنا خالد سعيد "وفوجئت ان الناس دى مختارتش طعمها .. وانهم بيطالبو بحق الشهيدهنا اصابتنى حالة من الحيرة الشديدة .. الناس دى وطنيين وف نفس الوقت مش بيختارو طعمهم ..والناس التانيين وطنيين وبيختارو طعمهم ومش عارف امشى مع مين
فى الوقت دا كان فى ناس كتير اختارت طعمها .. طعم الملوخية ..وبطعم الطعمية ونا لسة محتار اختار الطعم بتاعى .. واللا اطالب بحق مصر

وفى حين ما كانت الناس بتختار طعمها .. جيت قضية رجائى سلطان .. ومحمد صلاح .. وقضايا فساد فى كل مكان..حوادث هنا .. ومشاكل هناك .. والناس لسة بتختار طعمها
فى الوقت دا يوليو كان قرب يخلصوبرغم المشاكل الكتيرة اللى بتحصل لينا .. شيبسى قدرت تحسم الموقف.. ونقذتنى من الحيرة اللى انا فيها

لما روحت وفتحت التليفزيون لقيت حاجة غريبة " افرحو يا مصريين .. الله يا صيادين ...مصر اختارت جمبررىىىىىىىىىىى"وهتافات من هنا وهناك ..يتبين منها كما لو أن مصر فاازت بكأس العالم مع ان اصغر مشكلة فى مصر اهم من كأس العالم .. زى مثلا ازمة رغيف العيش " ادام الله ذكره " اتضحلى ان الناس مخترتش طعم جمبرى وان الناس مصممة انها تختار طعم الحشيش .. اللى أذهب عقلهم .. وخلاهم ميفكروش فى حاجة . بسبب التخدير اللى عايشين فيه فيا ترى شيبسى هتقدر تنزلنا طعم جديد يفوقنا من اللى احنا فيه..هتخلينا نعرف مطالبنا الحقيقية وحقوقنا .. واللا هتكتفى
بالجمبرى

انا متابع الخطة ولو حصل تغيير مش هبخل عليكم .. لأن اختيار الطعم واجب وطنى يحتم على كل واحد فينا انه يختار طعمه
بس للأسف يوليو خلص ..فهستنى للمرة اللى جاية اللى هيعلنو فيها عن فتح باب اختيار الطعم

تحذير شديد الاهمية " ياريت تبقى تبعت قبل أخر يوليو ".. بس